ავსტრიელმა პროკურორებმა ორშაბათს ტერორიზმის ბრალდება წაუყენეს ამჟამად 21 წლის მამაკაცს, რომელიც ტეილორ სვიფტის 2024 წლის აგვისტოში ვენაში დაგეგმილ კონცერტზე თავდასხმის დაგეგმვაშია ბრალდებული. ვენის საჯარო პროკურატურის ცნობით, ეჭვმიტანილს, რომელიც 2024 წლის აგვისტოში დაკავების შემდეგ პატიმრობაში იმყოფება, ტერორიზმის, კრიმინალური ორგანიზაციის წევრობისა და სხვა დანაშაულებრივი ქმედებებისთვის აქვს ბრალი წარდგენილი. პროკურატურის განცხადებაში ეჭვმიტანილის სახელი არ დასახელებულა, თუმცა ავსტრიულმა მედიამ ის ბერან ა.-დ მოიხსენია. ბრალის დამტკიცების შემთხვევაში მას 20 წლამდე პატიმრობა ემუქრება. პროკურორებმა განცხადებაში აღნიშნეს, რომ 21 წლის ავსტრიელი ბრალდებულია ტერორისტული ორგანიზაციის წევრობაში 2023 წლის მაისიდან „მომღერალ ტეილორ სვიფტის კონცერტზე ტერორისტული თავდასხმის დაგეგმვითა და მომზადებით“. მათ დაამატეს, რომ ის მონაწილეობდა ე.წ. „ისლამური სახელმწიფოს“ ჯგუფის საქმიანობაში და „ღიად უჭერდა მხარს“ მის პროპაგანდას სხვადასხვა შეტყობინებების სერვისის მეშვეობით და სჩადიოდა სხვა დანაშაულებრივ ქმედებებს. პროკურორების განცხადებით, კონცერტზე თავდასხმის დაგეგმვისას, ეჭვმიტანილი, სავარაუდოდ, იარაღის მოპოვებას ცდილობდა, მცირე რაოდენობით ასაფეთქებელი ნივთიერებები აწარმოა, მუშაობდა ნამსხვრევის ბომბის შექმნაზე, რომელიც „IS-ის თავდასხმებისთვის არის დამახასიათებელი“ და „ისლამური სახელმწიფოს“ სხვა წევრებისგან მიიღო ინსტრუქციები ასაფეთქებელი ნივთიერებების დამუშავების შესახებ. ტეილორ სვიფტის რეკორდული „Eras“ ტურის სამი თარიღი გაუქმდა 2024 წლის ზაფხულში მას შემდეგ, რაც ხელისუფლებამ შეთქმულების შესახებ გააფრთხილა. მოგვიანებით მომღერალმა სოციალურ მედიაში დაწერა, რომ „გაუქმების მიზეზებმა ახალი შიშისა და უზარმაზარი დანაშაულის გრძნობა გამიჩინა, რადგან ამდენი ადამიანი აპირებდა ამ შოუებზე მოსვლას“. გასულ წელს, ბერლინის სასამართლომ სირიელი მოზარდი გაასამართლა ვენაში სვიფტის კონცერტზე თავდასხმის შეთქმულებაში მონაწილეობისთვის. 16 წლის მოზარდს 18-თვიანი პირობითი სასჯელი შეეფარდა. აშშ-ის დაზვერვამ ხელი შეუშალა შეთქმულების განხორციელებას.