უკრაინის პარლამენტის სპიკერი რუსლან სტეფანჩუკი გამოეხმაურა საქართველოს პარლამენტის თავმჯდომარის, შალვა პაპუაშვილის განცხადებებს, რომელმაც უკრაინის პრეზიდენტი ვოლოდიმირ ზელენსკი „უმადურ ადამიანად“ მოიხსენია, რომელიც არ აფასებს არც შეერთებულ შტატებს და არც საქართველოს. სტეფანჩუკის თქმით, ისინი, ვინც უკრაინას განუწყვეტლივ „უმადურობაში“ ადანაშაულებენ, სინამდვილეში საკუთარი ღირსების დაკარგვას ნიღბავენ და ამას, როგორც მან აღწერა, მონური მორჩილებით ანაცვლებენ. მანამდე შალვა პაპუაშვილმა განაცხადა, რომ საქართველო მხარს უჭერს უკრაინელ ხალხს, მაგრამ „არც ზელენსკი და მისი მოადგილეები, არც ბრიუსელი არ იმსახურებენ მხარდაჭერას, რადგან ისინი უმადური ხალხია“. „ზელენსკი უმადური ადამიანია. ის მადლიერებას არ იჩენს არც შეერთებული შტატების და არც საქართველოს მიმართ. შეგახსენებთ, მან [უკრაინის ელჩი საქართველოდან] გამოიწვია, რადგან ჩვენ უარი ვთქვით ქართველებისთვის ნება დაგვერთო, წასულიყვნენ საბრძოლველად და მომკვდარიყვნენ. ასე რომ, მათ შეუძლიათ თქვან „მადლობა“, მაგრამ საბოლოოდ მათი მადლიერება ჩვენ აღარ გვჭირდება. ჩვენ ამ ყველაფერს უკრაინელი ხალხისთვის ვაკეთებთ. ზელენსკის შესახებ საბოლოო განაჩენს თავად უკრაინელი ხალხი გამოიტანს“, - განაცხადა პაპუაშვილმა. რუსლან სტეფანჩუკმა განაცხადა: „უკრაინელები მადლიერი ერია. ჩვენ პატივს ვცემთ ყველას, ვინც გვეხმარება თავისუფლებისთვის და საკუთარი მომავლის არჩევის უფლებისთვის ბრძოლაში. და ჩვენ, რა თქმა უნდა, მადლობელი ვართ ქართველი ხალხის — ხალხის, რომელმაც ზუსტად იცის, რას ნიშნავს ღირსება. ხალხის, რომელიც მამაცურად გამოდის საკუთარი ქალაქების ქუჩებში უკრაინის მხარდასაჭერად. ხალხის, რომელიც, მოხალისეთა ბატალიონების შემადგენლობაში, მხარდამხარ იბრძვის ჩვენი საერთო რუსი მტრის წინააღმდეგ. ამ ფონზე, საქართველოს „მხარდაჭერა“ გაეროს რეზოლუციისადმი უკრაინის ტერიტორიული მთლიანობის შესახებ, ძნელად თუ შეიძლება აღიწეროს, როგორც ქველმოქმედება ან გმირობა. 2026 წელს ის მხოლოდ ელემენტარული ზრდილობის მინიმალურ სტანდარტს წარმოადგენს.“ მთავრობის სტრატეგია უფრო ფორმალურ დიალოგზეა ორიენტირებული, ვიდრე რეალური რეფორმების გატარებაზე. მან დაამატა: „მათ, ვინც უკრაინის (ქვეყნის, რომელიც სისხლს ღვრის არსებობის უფლებისთვის ბრძოლაში) მიმართ „უმადურობის“ მუდმივი ბრალდებებით ცდილობს საკუთარი ღირსების დაკარგვის დამალვას და სანაცვლოდ მონურ მორჩილებას ავლენს, მინდა შევახსენო დიდი ქართველი ფილოსოფოსის, მერაბ მამარდაშვილის სიტყვები: „არ არსებობს ადამიანის თავისუფლების ფორმულა და არც ადამიანის სისულელის წამალი. პოლიტიკური ეფექტურობა ყველაზე მნიშვნელოვანი არ არის. თავისუფლებაა.“ და ბოლოს, უკრაინას არ სჭირდება ლექციები მორალისტებისგან, რომლებიც ე.წ. „რუსული სამყაროს“ ნარატივების გამაძლიერებლებად მოქმედებენ. უკრაინას სჭირდება ჭეშმარიტი მოკავშირეები – ისინი, ვინც ესმის, რომ რუსულ აგრესიასთან ბრძოლაში მნიშვნელობა აქვს არა კომპლიმენტებს, არამედ პრინციპებსა და მხარდაჭერას.“