შვეიცარიაში მატარებელი რელსებიდან გადავიდა – ხუთი ადამიანი დაშავდა, მიზეზად ზვავი სახელდება

შვეიცარიის სამხრეთ ნაწილში მატარებელი რელსებიდან გადავიდა, რის შედეგადაც ხუთი ადამიანი დაშავდა. პოლიციის განცხადებით, ინციდენტის მიზეზი, შესაძლოა, ზვავი გამხდარიყო. ოფიციალური პირების ინფორმაციით, ავარია ადგილობრივი დროით დაახლოებით 07:00 საათზე (06:00 GMT) მოხდა სოფელ გოპენშტაინის მახლობლად, სადაც ზვავის საშიშროების გაფრთხილება მოქმედებდა. პოლიციის ცნობით, მატარებლის 29-ვე მგზავრი გადაარჩინეს, დაშავებულებიდან კი ერთი საავადმყოფოში გადაიყვანეს. ბოლო დღეებში შვეიცარიაში ძლიერი წვიმა და თოვლი მოდიოდა, ხოლო ქვეყნის თოვლისა და ზვავის კვლევის ინსტიტუტი აცხადებს, რომ ალპებში ზვავის რისკი ძალიან მაღალია. „წინასწარი მონაცემებით, შესაძლოა, მატარებლის გავლის წინ ზვავი გადავიდა ლიანდაგზე“, – განაცხადეს პოლიციაში და დასძინეს, რომ პროკურატურამ გამოძიება დაიწყო. „ხუთი ადამიანი დაშავდა. მათგან ერთი საავადმყოფოში გადაიყვანეს“, – დაამატა პოლიციამ. რეგიონალური საგარეუბნო მატარებელი შპიეციდან ბრიგისკენ მიემართებოდა, როდესაც ის რელსებიდან გადავიდა. გოპენშტაინი, რომელიც საგზაო და სარკინიგზო ტრანსპორტის მნიშვნელოვანი კერაა, ლეჩბერგის სარკინიგზო გვირაბის გამოსასვლელთან მდებარეობს. პოლიციის ცნობით, მატარებელი გვირაბიდან გამოსვლისას გადავიდა რელსებიდან. რეგიონში ზვავის საშიშროების მეორე უმაღლესი დონეა გამოცხადებული – ხუთიდან მეოთხე. ძლიერი თოვლის გამო, საფრანგეთის საზღვართან მდებარე სოფელ ორსიერიდან 50 ადამიანი ევაკუირებული იქნა. ხელისუფლებამ მოთხილამურეებს გაფრთხილება მისცა, რომ მხოლოდ მონიშნულ ფერდობებზე დარჩნენ, მთაში მოსიარულეებმა კი გასვლამდე ზვავის ბიულეტენები უნდა შეამოწმონ. გასულ თვეს, გერმანელი მამაკაცი დაიღუპა ზვავში, ხოლო ოთხი სხვა ადამიანი დაშავდა, როდესაც ისინი შვეიცარიის ალპებში თხილამურებით სრიალებდნენ.