სამხრეთ ოსეთის პრემიერ-მინისტრი. სამხრეთ ოსეთში, ოპოზიციის წინააღმდეგობის მიუხედავად, ახალი პრემიერ-მინისტრი დაინიშნა, რომელმაც უკვე დაიმსახურა კრიტიკა წინა თანამდებობაზე მუშაობის გამო. ოპოზიციურმა პარტია „ერთიანმა ოსეთმა“ უარი თქვა მხარი დაეჭირა პრეზიდენტ ალან გაგლოევის კანდიდატისთვის, ჯამბოლატ თადტაევისთვის, პრემიერ-მინისტრის თანამდებობაზე. პარტიის საპარლამენტო ფრაქციამ, თავმჯდომარე აცამაზ ბიბილოვის ხელმძღვანელობით, სხდომა პროტესტის ნიშნად დატოვა. ოპოზიცია სამხრეთ ოსეთის სოციალურ-ეკონომიკურ კრიზისს პირდაპირ უკავშირებს თადტაევს, რომელიც ბოლო დრომდე ვიცე-პრემიერისა და ფინანსთა მინისტრის თანამდებობას იკავებდა. 21 იანვარს სამხრეთ ოსეთის ხელმძღვანელმა წინა მთავრობა დაითხოვა. პრეზიდენტმა ალან გაგლოევმა ეს გადაწყვეტილება „ჩვეულებრივ სიტუაციად“ შეაფასა. აცამაზ ბიბილოვმა თადტაევიც და პრეზიდენტი გაგლოევიც დაადანაშაულა 2025 წლის სოციალურ-ეკონომიკური განვითარების პროგრამის შეუსრულებლობაში. მისი თქმით, თადტაევს არ გააჩნდა პროფესიული კომპეტენცია და მორალური ავტორიტეტი, რათა ეკავა პრემიერ-მინისტრის თანამდებობა. 2022–2025 წლების პროგრამის წარუმატებლობის მიუხედავად, გაგლოევმა და თადტაევმა დაუყოვნებლივ განაცხადეს 2026–2030 წლების ახალი სოციალურ-ეკონომიკური განვითარების გეგმის ამოქმედების შესახებ, რომელიც, ისევე როგორც წინა, რუსეთის მიერ დაფინანსდება. „ჩვენ ვერ ვხედავთ, როგორ შეძლებს ის მომავალი პროგრამის განხორციელებას. ნათელია, რომ ეს ადამიანი უბრალოდ სხვა თანამდებობაზე გადაიყვანეს, სადაც შედეგები კვლავ არ იქნება. ჩვენი ფრაქცია მიიჩნევს, რომ ეს კანდიდატურა წარდგენილი იქნა იმისთვის, რომ მათ პასუხისმგებლობისთვის თავი აერიდებინათ. ჩვენ უბრალოდ გადავწყვიტეთ, მონაწილეობა არ მიგვეღო ამ ფარსში“, – განაცხადა ბიბილოვმა. თუმცა, ოპოზიციის პროტესტის მიუხედავად, თადტაევის კანდიდატურა პარლამენტმა დაამტკიცა. მომხრედ ხმა მისცეს პრო-საპრეზიდენტო პარტია „ნიხასის“, „სახალხო პარტიისა“ და „სამხრეთ ოსეთის კომუნისტური პარტიის“ დეპუტატებმა. იმავე დღეს გაგლოევმა ხელი მოაწერა ბრძანებულებას ჯამბოლატ თადტაევის პრემიერ-მინისტრად დანიშვნის შესახებ. ოპოზიციური პარტია „ერთიანი ოსეთი“ აცხადებს, რომ კონფლიქტის ზონაში არსებულმა ქართულმა საგუშაგომ ხელი შეუწყო ალან გაგლოევს პრეზიდენტად გახდომაში. სამხრეთ ოსურ ტელეგრამის არხებზე ვრცელდება ინფორმაცია, რომ თადტაევის კანდიდატურაზე გავლენა იქონია მისმა ოჯახურმა კავშირებმა გაგლოევის ერთ-ერთ ახლო მოკავშირესთან, სკანდალებით ცნობილ სამხრეთ ოსეთის კგბ-ს ხელმძღვანელის პირველ მოადგილესთან, ალექსანდრე ტუაევთან. თადტაევი ტუაევის დაზეა დაქორწინებული. ის ასევე არის არსენ გაგლოევის ნათლული, რომელიც ხშირად მოიხსენიება როგორც სამხრეთ ოსეთის პოლიტიკის „ნაცრისფერი კარდინალი“ და რომელმაც, გავრცელებული ინფორმაციით, გადამწყვეტი როლი ითამაშა ალან გაგლოევის პრეზიდენტობამდე მიყვანაში. ადგილობრივი ანალიტიკოსი აცხადებს, რომ აცამაზ ბიბილოვისა და „ერთიანი ოსეთის“ მიერ გაგლოევისა და მისი გარემოცვისთვის გამოწვევა იმაზე მიუთითებს, რომ საშინაო პოლიტიკური სიტუაცია სერიოზული დაპირისპირების პერიოდში შედის. „ოპოზიცია დიდხანს იჩენდა თავშეკავებას და თავს არიდებდა დრამატულ ნაბიჯებს სტაბილურობის შესანარჩუნებლად, მაგრამ ხელისუფლებამ ეს სისუსტედ და პარტიის მოქმედების უუნარობად აღიქვა. გასულ წელს, „ერთიანი ოსეთის“ საბანკო ანგარიშები გაყინული იქნა, როგორც თავად აცხადებენ, მოგონილი საფუძვლებით, და ზეწოლა ხორციელდებოდა მის წევრებზე — ეს ყველაფერი გაგლოევის სუსტი და არაეფექტური მმართველობის ფონზე. თადტაევის დანიშვნა მიანიშნებს მოქმედი მმართველი გუნდის მცდელობაზე, შეინარჩუნოს ძალაუფლება და დაფაროს შესაძლო კორუფციის კვალი“, – განაცხადა ანალიტიკოსმა. მისი აზრით, საპრეზიდენტო არჩევნების მოახლოებასთან ერთად, პრეზიდენტის წრეში არსებული კორუფციის მეტი მტკიცებულება გახდება საჯარო. პუბლიკაციაში მოცემული ტერმინები, გეოოგრაფიული დასახელებები, მოსაზრებები, იდეები და სტრატეგიები ეკუთვნის ავტორს და შესაძლოა არ ემთხვეოდეს JAMnews-ის ან მისი ცალკეული თანამშრომლების მოსაზრებებს. JAMnews იტოვებს უფლებას წაშალოს კომენტარები პოსტებზე, რომლებიც შეურაცხმყოფელად, მუქარად, ძალადობრივად ან სხვაგვარად ეთიკურად მიუღებლად იქნება მიჩნეული. © JAMnews 2025 - ყველა უფლება დაცულია.