ორშაბათს, ბრიტანეთის პოლიციამ აშშ-ში დიდი ბრიტანეთის ყოფილი ელჩი, პიტერ მანდელსონი, დააკავა სამსახურებრივი გადაცდომის გამოძიების ფარგლებში, რომელიც დაკავშირებულია გარდაცვლილ ფინანსისტთან და მსჯავრდებულ სექსუალურ მოძალადე ჯეფრი ეპშტეინთან მის კავშირებთან. ლონდონის მეტროპოლიტენის პოლიციის განცხადებით, „ოფიცრებმა 72 წლის მამაკაცი დააკავეს საჯარო სამსახურში გადაცდომის ბრალდებით“. ის დაკითხვაზე გადაიყვანეს ლონდონის პოლიციის განყოფილებაში, მოგვიანებით კი გაათავისუფლეს. „საჯარო სამსახურში გადაცდომის ბრალდებით დაკავებული 72 წლის მამაკაცი გათავისუფლებულია გირაოს სანაცვლოდ, შემდგომი გამოძიების მოლოდინში“, – ნათქვამია მეტროპოლიტენის პოლიციის განცხადებაში. პოლიციამ განცხადებაში ყოფილი ელჩის სახელი არ დაასახელა, თუმცა ეჭვმიტანილი მანამდე იდენტიფიცირებული იყო როგორც მანდელსონი, რომელიც პოლიციის თანამშრომლებმა მისი ლონდონის სახლიდან არასამარკო მანქანამდე მიაცილეს. მანდელსონს ბრალად ედება ეპშტეინისთვის სენსიტიური ინფორმაციის გადაცემა ბიზნეს მდივნის თანამდებობაზე მუშაობის დროს, თანამდებობა, რომელიც მან 2008-2010 წლებში ეკავა ლეიბორისტული პარტიის ყოფილი პრემიერ-მინისტრის გორდონ ბრაუნის დროს. ეპშტეინი 2008 წელს მცირეწლოვანის მიმართ სექსუალური დანაშაულისთვის გაასამართლეს. მანდელსონი გასულ წელს, თებერვლიდან სექტემბრამდე, დიდი ბრიტანეთის ელჩად მსახურობდა შეერთებულ შტატებში. ის პრემიერ-მინისტრმა ქირ სტარმერმა გაათავისუფლა თანამდებობიდან მას შემდეგ, რაც გარდაცვლილ ფინანსისტთან მისი კავშირები გამოვლინდა დოკუმენტების პარტიაში, რომელიც ცნობილია როგორც „ეპშტეინის ფაილები“ და რომელიც აშშ-ის იუსტიციის დეპარტამენტმა გამოაქვეყნა. მანდელსონი 1990-იან წლებში ბრიტანეთის ლეიბორისტული პარტიის „ახალ ლეიბორისტებად“ (New Labour) რეფორმირების ერთ-ერთ მთავარ ფიგურად ითვლებოდა და სხვადასხვა მინისტრის თანამდებობა ეკავა ყოფილი პრემიერ-მინისტრის ტონი ბლერის დროს. თანამედროვე პოლიტიკური კომუნიკაციების მისმა ოსტატობამ მას ბრიტანულ პოლიტიკურ წრეებში მეტსახელი „სიბნელის პრინცი“ (Prince of Darkness) დაუმკვიდრა. მას 2008 წელს მიენიჭა სამუდამო პერის ტიტული, არა-მემკვიდრეობითი წოდება, რომელიც მას ლორდთა პალატაში მოღვაწეობისა და მინისტრის თანამდებობის დაკავების საშუალებას აძლევდა, მიუხედავად იმისა, რომ ის პარლამენტის არჩეული წევრი არ იყო. მანდელსონი დაკავებულია „საჯარო სამსახურში გადაცდომის“ ეჭვით – იგივე დანაშაული, რისთვისაც ბრიტანეთის ყოფილი პრინცი, ენდრიუ მაუნტბატენ-უინძორი იყო ეჭვმიტანილი. არსებითად, კორუფციის ბრალდება, „საჯარო სამსახურში გადაცდომა“ ითვლება ერთ-ერთ ყველაზე რთულ დანაშაულად გამოსაძიებლად, ბრალის წასაყენებლად, სისხლისსამართლებრივი დევნისთვის და მსჯავრის დასადებად. პროკურორებმა უნდა დაამტკიცონ, რომ ეჭვმიტანილმა, რომელსაც საჯარო თანამდებობა უნდა ეკავა, განზრახ ჩაიდინა გადაცდომა იმ ხარისხით, რომ ეს წარმოადგენდა „საზოგადოების ნდობის ბოროტად გამოყენებას“ და რომ მოცემული პირი მოქმედებდა გონივრული საბაბის ან გამართლების გარეშე. მანდელსონი უარყოფს ნებისმიერ დანაშაულს და, BBC-ის, ეროვნული მაუწყებლის ცნობით, დარწმუნებულია, რომ „არ მოქცეულა რაიმე სახით კრიმინალურად“.