ინდოეთის პრემიერ-მინისტრმა მოდიმ კრიტიკული მინერალებისა და იშვიათი მიწების ელემენტების შესახებ შეთანხმებას „მდგრადი მიწოდების ჯაჭვების მშენებლობისკენ გადადგმული მნიშვნელოვანი ნაბიჯი“ უწოდა. ბრაზილიამ და ინდოეთმა ხელი მოაწერეს შეთანხმებას კრიტიკული მინერალებისა და იშვიათი მიწების ელემენტების სფეროში თანამშრომლობის გაფართოების შესახებ, ვინაიდან ინდოეთის მთავრობა ცდილობს, ახალი მომწოდებლები მოიძიოს ჩინეთზე დამოკიდებულების შესამცირებლად. ბრაზილიის პრეზიდენტი ლუის ინასიუ ლულა და სილვა ინდოეთის პრემიერ-მინისტრ ნარენდრა მოდის შაბათს, ნიუ დელიში შეხვდა და ვაჭრობისა და ინვესტიციების შესაძლებლობების გაძლიერება განიხილა. მოდიმ განცხადებაში აღნიშნა, რომ კრიტიკული მინერალებისა და იშვიათი მიწების ელემენტების შესახებ შეთანხმება იყო „მნიშვნელოვანი ნაბიჯი მდგრადი მიწოდების ჯაჭვების მშენებლობისკენ“. ჩინეთი დომინირებს მსოფლიოს იშვიათი მიწების ელემენტებისა და კრიტიკული მინერალების მოპოვებასა და გადამუშავებაში და ბოლო თვეებში გააძლიერა თავისი კონტროლი ექსპორტზე, მაშინ როდესაც შეერთებული შტატები ცდილობს, დაარღვიოს მისი დომინანტობა ამ მზარდ ინდუსტრიაში. თუმცა, ბრაზილიისთვის, რომელიც ჩინეთის შემდეგ მსოფლიოში კრიტიკული მინერალების სიდიდით მეორე მფლობელია, მისი რესურსები გამოიყენება სხვადასხვა სფეროში, მათ შორის ელექტრომობილებში, მზის პანელებში, სმარტფონებში, რეაქტიულ ძრავებსა და მართვად რაკეტებში. განცხადებაში ლულამ თქვა: „ინვესტიციების გაზრდა და თანამშრომლობა განახლებადი ენერგიებისა და კრიტიკული მინერალების საკითხებში, არის იმ პიონერული შეთანხმების საფუძველი, რომელსაც დღეს მოვაწერეთ ხელი“. მიუხედავად იმისა, რომ მინერალების შეთანხმების შესახებ ჯერჯერობით ცოტა დეტალია ცნობილი, ინდოეთში გაიზარდა რკინის მადნის მოთხოვნა – მასალის, რომლის სიდიდით მეორე მწარმოებელი და ექსპორტიორი ბრაზილიაა ავსტრალიის შემდეგ, ინფრასტრუქტურის სწრაფი გაფართოებისა და სამრეწველო ზრდის ფონზე. რიშაბ ჯაინმა, ნიუ დელიში დაფუძნებული ენერგეტიკის, გარემოსა და წყლის საბჭოს (Council on Energy, Environment and Water) ანალიტიკური ცენტრის ექსპერტმა, AFP სააგენტოს განუცხადა, რომ ინდოეთის მზარდი თანამშრომლობა ბრაზილიასთან კრიტიკული მინერალების საკითხზე, მიწოდების ჯაჭვის ბოლოდროინდელი თანამშრომლობების გაგრძელებაა აშშ-სთან, საფრანგეთთან და ევროკავშირთან. „გლობალური სამხრეთის ალიანსები გადამწყვეტია დივერსიფიცირებული, ადგილობრივი რესურსებზე წვდომის უზრუნველსაყოფად და გლობალური ვაჭრობის ახალი წესების ჩამოსაყალიბებლად“, - განუცხადა ჯაინმა AFP-ს. ინდოეთის საგარეო საქმეთა სამინისტროს სპიკერმა განაცხადა, რომ კრიტიკული მინერალებისა და იშვიათი მიწების ელემენტების შესახებ შეთანხმებასთან ერთად, ხელი მოეწერა ცხრა სხვა შეთანხმებასაც, მათ შორის ურთიერთგაგების მემორანდუმს, რომელიც მოიცავდა ციფრული თანამშრომლობიდან ჯანდაცვას. მეტიც, მოდიმ ბრაზილიას ინდოეთის „ლათინურ ამერიკაში უმსხვილესი სავაჭრო პარტნიორი“ უწოდა. „ჩვენ მზად ვართ, მომდევნო ხუთ წელიწადში ჩვენი ორმხრივი ვაჭრობა $20 მილიარდს გადააჭარბოს“, - განაცხადა მან. „ჩვენი ვაჭრობა მხოლოდ ციფრი კი არა, ნდობის ასახვაა“, - თქვა მოდიმ და დასძინა, რომ „როდესაც ინდოეთი და ბრაზილია ერთად მუშაობენ, გლობალური სამხრეთის ხმა ძლიერდება და უფრო თავდაჯერებული ხდება“. ინდოეთის საგარეო საქმეთა მინისტრმა სუბრაჰმანიამ ჯაიშანკარმა ასევე განაცხადა, რომ დარწმუნებულია, ლულასა და მოდის მოლაპარაკებები „ახალ იმპულსს მისცემს მათ ურთიერთობებს“. ეკონომიკური კომპლექსურობის ობსერვატორიის (OEC) 2024 წლის მონაცემებით, ინდოეთის ექსპორტმა ბრაზილიაში $7.23 მილიარდი შეადგინა, სადაც მთავარი საექსპორტო პროდუქტი რაფინირებული ნავთობი იყო. თავის მხრივ, ბრაზილიის ექსპორტმა ინდოეთში $5.38 მილიარდი შეადგინა, ძირითად საექსპორტო პროდუქტად კი ნედლი შაქარი სახელდება.