გერმანიისა და გაერთიანებული სამეფოს სამხედრო მაღალჩინოსნები აცხადებენ: „გადაიარაღება ომის გაჩაღება არ არის“. გერმანიის ბუნდესვერის თავდაცვის მეთაურმა, გენერალმა კარტსენ ბროიერმა და გაერთიანებული სამეფოს თავდაცვის შტაბის უფროსმა, ავიაციის მთავარმა მარშალმა სერ რიჩარდ ნაიტონმა, რუსეთის მიერ შექმნილი საფრთხის ფონზე, უკრაინაში შეჭრის შემდეგ, ერთობლივად დაასაბუთეს გადაიარაღების „მორალური“ აუცილებლობა. მაღალჩინოსნებმა ერთობლივი წერილი გამოაქვეყნეს The Guardian-სა და გერმანულ გაზეთ Welt-ში, სადაც ნათქვამია, რომ გადაიარაღებისთვის „მორალური“ არგუმენტი არსებობს. ბროიერმა და ნაიტონმა განაცხადეს, რომ ისინი საუბრობდნენ „არა მხოლოდ როგორც ევროპის ორი უმსხვილესი სამხედრო დამხარჯველი ქვეყნის ლიდერები, არამედ როგორც ევროპის ხმები, რომელმაც ახლა უნდა გაუმკლავდეს უსიამოვნო სიმართლეს საკუთარი უსაფრთხოების შესახებ“. მათი თქმით, რუსეთის სამხედრო პოზიცია „გადამწყვედად დასავლეთისკენ შეიცვალა“ და რომ ის ახორციელებს გადაიარაღებას, სწავლობს უკრაინაში შეჭრის გაკვეთილებს, თან „რეორგანიზაციას ატარებს ისე, რომ შეიძლება გაზარდოს ნატოს ქვეყნებთან კონფლიქტის რისკი“. სამხედრო ლიდერების განცხადებით, რუსეთის სამხედრო გაძლიერება, „კონტინენტზე ომის წარმოების მის მზაობასთან ერთად, რაც მტკივნეულად გამოჩნდა უკრაინაში, წარმოადგენს გაზრდილ რისკს, რომელიც ჩვენს კოლექტიურ ყურადღებას მოითხოვს“. ლიდერებმა გააფრთხილეს, რომ თუ რუსეთი ევროპაში სისუსტეს ან განხეთქილებას დაინახავს, „შესაძლოა გაბედოს და გააფართოოს თავისი აგრესია უკრაინის მიღმა“. ამ მიზნით, წერილში ნათქვამია, რომ „სამხედრო მზადყოფნა უნდა ნიშნავდეს ძლიერ თავდაცვით ინდუსტრიას“. მათ ხაზი გაუსვეს გაერთიანებულ სამეფოში საბრძოლო მასალების ქარხნების მშენებლობასა და გერმანული საბრძოლო ბრიგადის განთავსებას ნატოს აღმოსავლეთ ფლანგზე, ასევე ახსენეს ბერლინის მცდელობები, რომ „თავდაცვისთვის არსებითად შეუზღუდავი დაფინანსება იყოს ხელმისაწვდომი“. გერმანიის მთავრობა მნიშვნელოვნად მეტს ხარჯავს თავდაცვაზე, რადგან ის ცდილობს ბუნდესვერის მოდერნიზებასა და გაძლიერებას — მას ათწლეულების განმავლობაში შეკვეცები ჰქონდა. რუსეთის სრულმასშტაბიანმა შეჭრამ უკრაინაში 2022 წლის თებერვალში გერმანიის უსაფრთხოების პოლიტიკაში შემობრუნება გამოიწვია, რომელიც მანამდე სამხედრო თავშეკავებას ეფუძნებოდა. მათ წერილში ასევე ნათქვამია: „ამ მცდელობას მორალური განზომილება აქვს. გადაიარაღება ომის გაჩაღება არ არის; ეს არის იმ ქვეყნების პასუხისმგებლობით მოქმედება, რომლებიც მზად არიან დაიცვან თავიანთი ხალხი და შეინარჩუნონ მშვიდობა. ძალა აკავებს აგრესიას. სისუსტე კი იწვევს მას“. ბროიერმა და ნაიტონმა დაასკვნეს, რომ აუცილებელია „მთელი საზოგადოების“ მიდგომა და რომ თავდაცვა მხოლოდ ფორმაში მყოფ პირებს არ უნდა დაეკისროს. „მთელი საზოგადოების თავდაცვა მოითხოვს მდგრად ინფრასტრუქტურას, კერძო სექტორის მაღალტექნოლოგიურ კვლევასა და განვითარებას, და ეროვნულ ინსტიტუტებს, რომლებიც მზად არიან ფუნქციონირებისთვის მზარდი საფრთხეების პირობებში“, – განაცხადეს სამხედრო ხელმძღვანელებმა. „როდესაც ევროპა ერთად მოქმედებს, ჩვენ ვართ ძლიერი ძალა. და როცა ერთად ვიმოქმედებთ, ჩვენ არ ვართ მხოლოდ დიდი ბრიტანეთი და გერმანია“. სამხედრო ხელმძღვანელების გაფრთხილება მიუნხენის უსაფრთხოების ყოველწლიური კონფერენციის დასრულების შემდეგ გაკეთდა, სადაც მსოფლიო ლიდერები ევროპის თავდაცვასა და უკრაინის ომზე სასაუბროდ შეიკრიბნენ.