აზერბაიჯანის ხელისუფლებამ ორი ტიკტოკერი — სარდარ მაჯნუნოვი (Serdar Inanki) და რენა ჯაფაროვა (Renka) — დააკავა, სავარაუდოდ, „უხამსი გამონათქვამების ან ჟესტების“ შემცველი კონტენტის გამოქვეყნებისთვის. პრო-სამთავრობო მედია საშუალება Oku.az-ის ცნობით, ორივე სამშაბათს დააკავეს. მაჯნუნოვს ბრალი წაუყენეს სოციალურ მედიაში უხამსი გამონათქვამების ან ჟესტების გამოქვეყნებისთვის და ყარადაღის რაიონული სასამართლოს გადაწყვეტილებით 20 დღით პატიმრობა შეუფარდეს. კიდევ ერთ ტიკტოკერს, ჯაფაროვას, რომელიც ონლაინში Renka-ს სახელით არის ცნობილი, იგივე დანაშაული დასდეს ბრალად და ნარიმანოვის რაიონულმა სასამართლომ 750 მანათით ($440) დააჯარიმა. სასამართლომ მას შეღავათი მიანიჭა იმის გამო, რომ არასრულწლოვანი შვილი ჰყავს. დაკავებები მოხდა ადმინისტრაციულ სამართალში ახალი ცვლილებების მიღებიდან მალევე, რომელსაც პრეზიდენტმა ილჰამ ალიევმა დეკემბერში მოაწერა ხელი. ახალი ცვლილებები ოფიციალურად 26 იანვარს შევიდა ძალაში. კანონის თანახმად, პირი, რომელიც საჯაროდ გამოხატავს საზოგადოებისადმი უპატივცემულობას, შეურაცხყოფს საზოგადოებრივ მორალს და ეროვნულ ღირებულებებს, ან იყენებს არაეთიკურ ენას, ექვემდებარება იურიდიულ პასუხისმგებლობას. კანონმდებლობა „ამორალურ“ პოსტებს წვრილმანი ხულიგნობის კატეგორიას მიაკუთვნებს. თებერვლის დასაწყისში, ქვიარ ტიკტოკერს სალმან მამედოვს, რომელიც სოციალურ მედიაში Velizarofficial-ის გვერდს მართავს, ბრალი დასდეს „ამორალურობის ხელშეწყობისთვის“ და 30 დღით თავისუფლების აღკვეთა მიუსაჯეს. ნარიმანოვის რაიონული სასამართლოს განკარგულებით, 24 წლის Instagram-ის მომხმარებელი ფ. ჰუსეინლი, 10 თებერვალს დააკავეს ბაქოს ერთ-ერთ პაბში უხამსი ვიდეოების გადაღებისა და სოციალურ მედიაში გამოქვეყნების ბრალდებით და მას ერთი თვით ადმინისტრაციული პატიმრობა შეუფარდეს. ახალი კანონმდებლობის თანახმად, სხეულის ნაწილების საჯარო ჩვენება ისეთი ფორმით, რომელიც მორალურ ნორმებსა და ეროვნულ ღირებულებებს ეწინააღმდეგება, ასევე შეიძლება ჩაითვალოს წვრილმან ხულიგნობად. იმავე ინციდენტის გამო კიდევ სამი პირი დააკავეს, რომელთა სრული სახელები პრო-სამთავრობო მედია საშუალება Telegraf.az-ს არ გაუსაჯაროებია. გამოცემის ცნობით, პოლიციამ ოქმი შეადგინა ჩ. ს-ის, რ. ხ-ის და ე. ა-ს წინააღმდეგ, რომლებიც, სავარაუდოდ, ვიდეოში ჩანდნენ. ქალს და ორ მამაკაცს ბრალი დასდეს „პაბში უხამსი ვიდეოს გადაღებასა და სოციალურ მედიაში გავრცელებისთვის, რითაც ღიად გამოხატეს საზოგადოებისადმი უპატივცემულობა“. Telegraf.az-ის ცნობით, ნარიმანოვის რაიონულმა სასამართლომ ვიდეოში მონაწილე ქალს 25 დღით პატიმრობა შეუფარდა, ხოლო დანარჩენი ორი მამაკაცი ასევე 25 დღით დააპატიმრეს. ახალი კანონმდებლობა ასევე გამოიყენება მთავრობის კრიტიკოსებისა და აქტივისტების წინააღმდეგ, რაც აზერბაიჯანში დამოუკიდებელი ექსპერტების შეშფოთებას იწვევს. 5 თებერვალს, ქურდახანის რაიონის აქტივისტს მოვსუმ მამედოვს, რომელიც სოციალურ მედიაში მთავრობის მკაცრი კრიტიკით არის ცნობილი, ქურდამირის რაიონულმა სასამართლომ 30 დღით პატიმრობა მიუსაჯა. მამედოვი ასევე დამნაშავედ ცნეს იმავე კანონმდებლობის საფუძველზე, რომელიც „ამორალურობას“ აკრიმინალებს. ადამიანის უფლებათა დამცველმა იურისტმა იალჩინ იმანოვმა OC Media-ს განუცხადა, რომ ეს ახალი რეგულაციები, რომლებიც მკაფიოდ არ განსაზღვრავენ, თუ რა წარმოადგენს „ამორალურ აქტივობას“, რომელიც ეწინააღმდეგება ღირებულებებს, ხელს შეუწყობს მთავრობის კონტროლის გაძლიერებას საზოგადოებაზე და თვითცენზურის ზრდას სოციალურ მედიაში. გამოცდილი ჟურნალისტი აიტანი მუშაობდა აზერბაიჯანულ, რეგიონულ და საერთაშორისო მედიასთან. ყოფილი Meydan TV-ის თანამშრომელი, ის ახლა საქართველოში ცხოვრობს, სადაც საგამოძიებო ჟურნალისტიკაზეა ორიენტირებული და ისეთ თემებს აშუქებს, როგორიცაა მთავრობის ანგარიშვალდებულება და ოჯახში ძალადობა. საქართველოს რეიტინგი გაიზარდა 2024 წლიდან, ხოლო სომხეთისა და აზერბაიჯანის რეიტინგები ორივემ დაიკლო. ჯ.დ. ვენსის ვიზიტი სამხრეთ კავკასიაში არ იყო რეგიონის ხელში ჩაგდებაზე — ის იყო პარტნიორობაზე და, პარადოქსულად, დამოუკიდებლობაზე. ალიევამ ჟურნალისტს „კაბის ტარება“ დააბრალა, როგორც შენიღბვა აზერბაიჯანის პოლიციისთვის თავის არიდების მიზნით 2014 წლის სამოქალაქო საზოგადოებაზე განხორციელებული რეიდის დროს. აზერბაიჯანის პრეზიდენტმა ილჰამ ალიევმა მთიანი ყარაბაღის სომხების სასამართლო პროცესები ნიურნბერგის პროცესებს შეადარა.