ავსტრალიამ AUKUS-ის უსაფრთხოების პაქტის ფარგლებში, ოსბორნში წყალქვეშა ნავების მშენებლობის ახალი ქარხნის შექმნისთვის საწყისი დაფინანსება გამოაცხადა. კვირას ავსტრალიამ 3.9 მილიარდი ავსტრალიური დოლარი (2.8 მილიარდი აშშ დოლარი, 2.3 მილიარდი ევრო) გამოყო გემთმშენებელი ქარხნის ასაშენებლად, რომელიც გაერთიანებულ სამეფოსთან და შეერთებულ შტატებთან AUKUS-ის უსაფრთხოების პაქტის ფარგლებში ბირთვული წყალქვეშა ნავების მიწოდებას შეუწყობს ხელს. ავსტრალიის პრემიერ-მინისტრმა ენტონი ალბანეზემ ეს თანხა სამხრეთ ქალაქ ადელაიდასთან ახლოს, ოსბორნში მდებარე ობიექტისთვის „ავანსად“ შეაფასა. „ინვესტიცია ოსბორნში წყალქვეშა ნავების მშენებლობის ქარხანაში გადამწყვეტი მნიშვნელობისაა ავსტრალიის ჩვეულებრივი შეიარაღებით აღჭურვილი, ატომური ენერგიის წყალქვეშა ნავების მიწოდებისთვის“, - განაცხადა ალბანეზემ განცხადებაში. ოფიციალური პროგნოზების მიხედვით, გრძელვადიან პერსპექტივაში ამ ობიექტზე დაახლოებით 30 მილიარდი ავსტრალიური დოლარი დაიხარჯება. სამმხრივი AUKUS-ის შეთანხმება 2021 წელს გამოცხადდა და ავსტრალიის ისტორიაში თავდაცვის სფეროში განხორციელებული უდიდესი ინვესტიციაა. ითვლება, რომ პაქტი მიზნად ისახავს ჩინეთის მზარდ გავლენასთან ბრძოლას ინდო-წყნარი ოკეანის რეგიონში. მომდევნო ათწლეულიდან გაერთიანებული სამეფო და აშშ კანბერას ატომური ენერგიის წყალქვეშა ნავებს მიაწვდიან. 2027 წლიდან აშშ-ის მართვის ქვეშ მყოფი Virginia-ს კლასის წყალქვეშა ნავები ავსტრალიაში განთავსდება, ხოლო რამდენიმე Virginia-ს კლასის წყალქვეშა ნავი კანბერას დაახლოებით 2030 წლიდან მიეყიდება. თავდაცვითი შეთანხმება, რომლის ღირებულება ასობით მილიარდი დოლარია, ითვალისწინებს გაერთიანებული სამეფოსა და ავსტრალიის მიერ AUKUS-ის ბირთვული წყალქვეშა ნავების ახალი კლასის მშენებლობას. ის ასევე მოიცავს ტექნოლოგიას, რომლის მეშვეობითაც ავსტრალია მომავალში საკუთარ ხომალდებს ააშენებს. ავსტრალიის თავდაცვის მინისტრმა რიჩარდ მარლსმა განაცხადა, რომ ოსბორნში არსებული ობიექტი ამ მიზნის ცენტრში იქნება. „ოსბორნში მიმდინარე ტრანსფორმაცია აჩვენებს, რომ ავსტრალია სწორ გზაზეა, რათა ათწლეულების განმავლობაში შექმნას სუვერენული შესაძლებლობა საკუთარი ბირთვული წყალქვეშა ნავების ასაშენებლად“, - თქვა მან. პრემიერ-მინისტრ ალბანეზეს თქმით, ოსბორნში წყალქვეშა ნავების მშენებლობის ქარხანა თითქმის 10 000 სამუშაო ადგილს შექმნის დიზაინსა და მშენებლობაში, ასევე ყოველწლიურად 1000-მდე სტაჟიორს ობიექტზე არსებულ სასწავლო დაწესებულებაში. სექტემბერში ავსტრალიამ 8 მილიარდი აშშ დოლარის ინვესტიცია წარადგინა პერტში არსებული გემთმშენებლობის ობიექტების მოდერნიზაციისთვის და მისი მომავალი ატომური წყალქვეშა ნავების ფლოტის ტექნიკური მომსახურების ცენტრად გადაქცევისთვის.